Gənc müğənni "Karvan" jurnalına müsahibə verib

Sevda Yəhyayevanın "Karvan" jurnalına müsahibəsini sizə təqdim edirik.

"Xalq konsertləri" layihənizə start vermisiniz. Bu kimin təşəbbüsü idi?

- Əslində, kimin təşəbbüsü olduğunu bilmirəm. Röya və Zamiqlə məsləhətləşib rayonlarda birgə konsert verməyi qərara aldıq. İlk konserti Naxçıvanda, Heydər Əliyev adına Sarayda verdik. Konsert çox gözəl şəraitdə, özü də dörd saat keçdi.

Layihə "Xalq konsertləri" adlandığından, sözsüz ki, pulsuz oldu. Çox gözəl. Bəs nə üçün sel basmış rayonlara getmədiniz? Onların maddi tələbatları təmin olunur, amma yaxşı olardı ki, çadırlarda belə konsertlər verib tək olmadıqlarını onlara hiss etdirəydiniz.

- Bu işdə mən tək deyiləm, gərək birlikdə qərar qəbul olunsun. Amma İnşallah, bu rayonlarda da konsertlər verəcəyik.

Bir nümunə kimi, Zülfiyə xanımı ideal götürmüsünüz. O, şəxsi həyatı barədə məlumat verir. Amma siz…

- Zülfiyyə xanım artıq neçə illərdir ki sənətdədir və onun deməyə sözü var. Mən qalmaqaldan uzaq olmağa çalışıram və bunu heç sevmirəm. Efirə çıxıb kiminsə saçını yolub gündəmdə qalmaq olmur. Əgər mənim səsim, sənətim və az da olsa, pərəstişkarlarım varsa, bu mənə bəsdir.

Son vaxtlar şou-biznes aləmində ailə quranlar, ərə gedənlər çoxalıb. Bəs Sevda xanım ailə qurmaq fikirində deyil?

- Hələ ki belə fikirim yoxdur. Konservatoriyanın ikinci kurs tələbəsiyəm, hələ qarşıda üç il var, görüləsi işlərim var. İnşallah, onları həyata keçirəndən sonra bu barədə də fikirləşəcəyəm. Əgər bu barədə hər hansı bir fikrim olsa, ilk növbədə, sizə xəbər verəcəyəm.

Sənətiniz göz qabağındadır, bəs sizi sənətçi bolluğu narahat etmir? İndi daş atırsan müğənniyə dəyir. Bu qədər çoxluq zövqlərin zəifləməsinə səbəb olmur? Axı onların hamısı istedadlı ola bilməz.

- Xeyr, sənətçilərin çox olmasının ziyanı yoxdur, belə olan halda tamaşaçıların seçim imkanı da çox olur. Düzdür, bir çoxları zümzümə etməyə başlamaqla sənətə gəlir, ifa etdikləri mahnıların hansı muğam üzərində və hansı tonallıqda oxunduğunu bilmir. Bəlkə də başqa sahələrdə onlar daha artıq müvəffəqiyyət qazana bilərdilər. Amma özləri bilə-bilə vaxtlarını hədər yerə sərf edirlər.

"Yeni Ulduz" layihəsi sizin kimi çox müğənnilər yetirib. Çəkdiyiniz zəhmət öz yerində. Sizcə, bu işdə bəxtiniz gətirib?

- Allahdan çox razıyam, bu işdə çox zəhmət çəkmişəm və deyə bilərəm ki, doğrudan da kim zəhmət çəkirsə, mütləq onun bəhrəsini görməlidir.

Sizcə, müsəlman qadını ərini necə xoşbəxt edə bilər?

- Mənə elə gəlir ki, öz abır-həyası, ismət və əxlaqı ilə. Hər zaman fikirləşməlidir ki, öz rəftar və davranışları ilə onun adını uca tutmalıdır.

Halal-harama necə, riayət edə bilirsiniz?

- Məncə, sənət adamları üçün halal-harama riayət etmək daha çətindir. Xüsusilə indiki zamanda. Mümkün olsa da, çox çətindir. Hər halda mümkün olmasaydı, bir çox dəyərli insanlarımız buna riayət edə bilməzdi. Düzdür, deyirlər, dinimizə görə, oxumaq olmaz, amma qurban olum Allaha, nə bilim… Mən bu barədə danışmaqdan qorxuram.

Nədən çox peşman olursunuz?

- Ümumiyyətlə, mən heç bir şeydən peşman olmuram və hələ şükür Allaha bu vaxta qədər olmamaşım da.

Yuxularınız çin çıxır?

- Düzünü desəm, gördüyüm yuxular yadımda qalmır, bir də ki, belə şeylərə inanmıram. Allahdan başqa heç bir şeyə inanmıram. Ən böyük Allahdır! Nə bilim, bəzən göz dəyməmək üçün gözmuncuğu taxırlar… Bunlar hamısı boş şeylərdir.

Həyatda və sənətdə ən yaxın dostunuz kimdir?

- Həyatda ən yaxın dotum anamdır, sənət dostlarıma gəldikdə, Röya ilə Zamiq və bəstəkar-müğənni Nazimdir. Mən onları çox sevirəm.