Ermənistan da öz namizədliyini irəli sürsə də üzv seçilə bilməyib

22-24 iyun tarixində Fransanın paytaxtı Parisdə YUNESKO-nun Baş Qərargahında Qeyri-maddi mədəni irsin qorunması üzrə Konvensiyanın iştirakçı dövlətlərinin Baş Assambleyasının üçüncü sessiyası keçirilib. Mədəniyyət və Turizm Nazirliyinin mətbuat xidmətinin məlumatına görə, sessiya zamanı Konvensiyanın fəaliyyət qaydaları nəzərdən keçirilərək, üzv dövlətlər tərəfindən edilmiş dəyişiklikər müzakirə edilib. Eyni zamanda sessiyada Qeyri-maddi mədəni irsin qorunması üzrə Hökumətlərarası Komitəyə 12 yeni üzv seçilməsi ilə bağlı seçki keçirilib.

Tədbirdə Azərbaycan Respublikasının YUNESKO yanında Daimi Nümayəndəliyi, eyni zamanda Azərbaycan Respublikası Mədəniyyət və turizm nazirinin müavini xanım Sevda Məmmədəliyevanın rəhbərliyi altında nümayəndə heyəti iştirak edib.

Komitəyə üzvlüyə səsvermə zamanı Azərbaycan Respublikası 72 səslə komitənin üzvü seçilib.
Ermənistan da öz namizədliyini irəli sürsə də səsvermə zamanı cəmi 19 səs toplayıb və üzv seçilə bilməyib.

Qeyd etmək istərdik ki, sözügedən komitənin üzvləri hər il YUNESKO-ya təqdim olunan qeyri-maddi irs nümunələrinin namizədlik fayllarını nəzərdən keçirir və rəylərini bildirirlər. Komitəyə seçilmək Azərbaycanın beynəlxalq nüfuzunun artmasını, beynəlxalq mədəni proseslərdə fəal rolunu bir daha nümayiş etdirdi.

Heydər Əliyev Fondunun prezidenti, YUNESKO və İSESKO-nun xoşməramlı səfiri Mehriban Əliyevanın Azərbaycan qeyri-maddi irs nümunələrinin qorunması və YUNESKO-Azərbaycan əlaqələrinin inkişafında göstərdiyi xidmətlər ölkəmizin belə bir mötəbər Komitəyə üzv seçilməsinə səbəb olub.

Hazırda Azərbaycan muğamı, Açıq sənəti, Novruz bayramı UNESKO-nun Qeyri-maddi mədəni irsin qorunması üzrə Reprezentativ siyahısındadır, Azərbaycan xalça sənətini daxil edilməsi bu il gözlənilir, növbəti il üçün isə Lahıc, Nic və Qırmızı qəsəbənin mədəniyyət məkanı adı altında təqdim edilməsi nəzərdə tutulur.