"Verdiyim sözü yerinə yetirirəm, məsuliyyətli insanam"

Natella Kərimova 1979-cu ildə Gəncədə anadan olub. İlk təhsilini də orada alıb. 1995-ci ildə Azərbaycan Dillər Universitetinin “Roman-german filologiyası” fakültəsinə daxil olub. 1996-cı ildə isə Azərbaycanda ilk dəfə keçirilən “Miss Bakı 1996” gözəllik müsabiqəsində iştirak edib və “Vitse Miss Bakı” adını qazanıb.

Aysel: Siz ölkəmizdə keçirilən ilk gözəllik müsabiqəsinin iştirakçısı olmusunuz, buna necə qərar verdiniz?
N.K.: Mən hər zaman incəsənətə maraq göstərmişəm. Bu müsabiqəyə qatılanda mənim məqsədim model olmaq deyildi. Sadəcə bu sahə maraqlı gəlirdi. Əslində hər zaman kino sahəsində çalışmaq və aparıcı olmaq istəyirdim. Bu istiqamətdə çalışmağıma isə müsabiqə bir qədər təkan verdi.

- Müsabiqədə hansı yerə layiq görüldünüz?
- Müsabiqədə «Vitse Miss Bakı» adını qazandım. Daha sonra “Miss Millenium”, 2001-ci ildə isə Bakı-Tiflis-Ceyhan layihəsi çərçivəsində keçirilən gözəllik müsabiqəsində Azərbaycan və Gürcüstan gözəlləri arasında “Miss Turizm Azərbaycan ” adına layiq görülmüşəm. Birinci yer belə adlanırdı. Sonradan «Miss turizm of globe» adlı beynəlxalq müsabiqədə iştirak etsəm də yer tuta bilmədim.

- Gözəllik müsabiqəsi həyatınızı hansı istiqmətdə dəyişdi? Yəni qarşınızda nə kimi imkanlar açıldı?
- Deməzdim ki, mühüm şəkildə nə isə dəyişdi. Düzdür, müəyyən qədər imkanlar açıldı. Aparıcılıq etməyə başladım, reklamlara çəkildim. Ancaq mən hələ Gəncədə olarkən də "Kəpəz" televiziyasında aparıcılıq etmişdim. Ən əsası müsabiqə tanınmağıma şərait yarandı.

- Xarici ölkələrin modellərinə nəzər saldıqda, görürük ki, onların xoşbəxt ailə həyatı var, ərə gedirlər, bəs bizdə bu niyə alınmır?
- Alınır və ya alınmır söhbəti düzgün deyil. Ailə qurmaq, alınıb-alınmamaq hər kəsin özündən asılıdır.

- Niyə modellərə münasibət yaxşı deyil?
- Tək modellərə yox, ümumiyyətlə gündəmdə, üzdə olan insanlara münasibət birmənalı deyil. Əlbəttə hər zaman qaydada olanlara paxıllıq edirlər. Bu da həmişə söz-söhbət yaradır.

- Ailə həyatınız haqqında nə deyə bilərsiz? Sevib ailə qurmusunuz?
- Bu haqqda danışmaq istəmirəm. Amma deyə bilərəm ki, 4 ildir evliyəm və 3 yaşlı bir oğlum var. Çalışıram ki, oğlum yaxşı tərbiyə alsın, artıq 15 paytaxt adı bilir. İnsan öyrəndiklərinin 50 faizini 3 yaşına qədər, qalan hissəni isə sonra öyrənir. Ona görə də çalışıram ki, onu lazımi qədər öyrədim.

- Hazırda nə işlə məşğulsunuz, pulunuzu necə qazanırsınız?
- Özümün model agentliyim var. 2003-cü ildə «İpək yolu» adlı agentlik açdım. Bundan əlavə bəzən kinolarda epizodik rollara da çəkilirəm. Amma əsas işim əlbəttə ki, model agentliyi ilə bağlıdır.

- Bir çox modellərdən fərqli olaraq ali təhsiliniz var. Niyə öz peşənizlə məşğul deyilsiniz?
- Həmişə arzum olub ki, fransız dilini öyrənim və jurnalist kimi fəaliyyət göstərim. Amma elə oldu ki, ingilis dilini öyrəndim və Azərbaycan Dillər Universitetinin Roman-german filologiyası fakültəsinə daxil oldum. Mən deyərdim ki, həm incəsənətə, həm də elmə həvəsliyəm. Arzum gələcəkdə özümü elm sahəsində inkişaf etdirməkdir, hətta elmi iş müdafiə etmək belə istəyirəm.

- Uzun müddət telekanallarda aparıcılıq etdiniz. Bəs niyə bu fəaliyyətiniz yarımçıq qaldı?
- Deməzdim ki, uzun müddət hansısa kanala bağlı olmuşam. Mən ümümiyyətlə iş mühitində sərbəstliyi xoşlayıram. Neçə saata kimi işdə oturum, bu mənlik deyil. Həm də əsasən prodakşnlarla işləyirdim. Bir müddət "SOY" prodakşnda çalışdım. Əsasən tədbirlərdə aparıcılıq edirəm. Məsələn, iqtisadiyyat və biznes sahəsində “Uğur Milli mükafatı”, “İlin kompaniyası”, internet sahəsində “NET milli mükafatı” adlı mükafatların təqdimat mərasimlərini həmişə mən aparmışam.

- Tez-tez eşidirik ki, hansısa dünyaşöhrətli model ana olandan 30 gün keçməmiş ideal formasına qayıdaraq podiuma çıxıb. Sizdə vəziyyət necədir?
- Əslində həmin modellər uşağa baxmırlar, ana südü vermirlər, ona görə də belə tez formaya qayıdırlar. Mənsə düz 2 yaş yarıma qədər oğluma süd vermişəm. Çünki əsas övladımdır. Ancaq buna baxmayaraq özümü formada saxlamağa da çalışmışam.

- Bədən formanızı necə qoruyursunuz: pəhriz, idman edirmisiniz?
- Xeyr, bunlar mənlik deyil. Daha çox aparat kosmetologiyasına üstünlük verirəm. Bir də ən əsası yoqa, daha doğrusu kalanetika ilə (baletlə yoqanın sintezi ilə) məşğul oluram. Ən çox da sağlam həyat tərzinə üstünlük verirəm. Bundan əlavə dərimə hər zaman vaxtı -vaxtında qulluq edirəm.

- Model biznesi dünyada ən gəlirli sahədəndir. Bəs Azərbaycan model biznesi sahəsində hansı dəyişiklikləri istərdiniz?
- Əlbəttə inanıram ki, bizdə də model biznesi inkişaf edəcək. İstərdim ki, geyim industriyası inkişaf etsin, yeni brendlər yaransın.

- Bir az geyim üslubunuzdan bəhs edin.
- Konkret geyim üslubum yoxdur. Düzdür klassik üslubu xoşlayıram. Amma gözübağlı moda arxasınca qaçmağı xoşlamıram. Mənə nə yaraşırsa, onu geyinirəm.

- Özünüzdə hansı keyfiyyəti bəyənirsiniz?
- Verdiyim sözü yerinə yetirirəm, məsuliyyətli insanam.

- Onda bəyənmədiyiniz keyfiyyətlər hansılardır.
- Tənbəllik, gecikmək, yuxudan gec durmaq...Bir işi o qədər uzadıram ki, ancaq son məqamda sıxışanda sona çatdırıram.

- Nə kimi maraqlarınız var?
- Futbolu çox sevirəm. Bu dəqiqə aktual olan dünya çempionatını maraqla izləyirəm. Konkret fanatı olduğum komanda yoxdur, ancaq yığmalara pərəstiş edirəm.